Smile

Ishte errësirë, gjë tashmë e zakonshme për kryeqytetin. 

Nën dritën e zbehtë të flakëve të qiririt po shfletoja librin mbi cilësitë e Profetit (a.s.), dhe u mahnita. 

Morali i lartë, thjeshtësia, ëmbëlsia, bujaria, zemërgjerësia, bukuria, respekti, butësia e dashuria ishin bërë petkat e tij. 

Abdullah b. Harithi thotë: “Nuk kam parë njeri më të buzëqeshur se Pejgamberi i Allahut.”

Buzëqeshja!

Është një dhuratë e mrekullueshme. 

M’u kujtua një shprehje: “Ajo s’varfëron askënd por pasuron atë që e jep.” 

Ajo mbin si një gonxhe kur shpirti është plot mirësi e dashuri. 

Sa e bukur do të ishte bota po qe se do të mbizotëronte buzëqeshja e ëmbël dhe e sinqertë, e lumtur e plot dinjitet. 

Buzëqeshja është fasadë e një shpirti të pastër.

Ndaj më vjen të thërras me tërë forcën e shpirtit:

“Bëhuni të mirë o njerëz, buzëqeshni.

Do të shihni si shpresa e gëzimi do të ulet në zemra,

Do të shihni se agimet do të jenë më të bukura

dhe e nesërmja do të buzëqeshë.”