Gjelbërimi i ambjenteve të shtëpisë

 

Ark. Brunilda Basha

Ditët e sotme, qasja  në natyrë dhe relaksimi në hapësirat e gjelbra po bëhet akoma më e vështirë duke marrë parasysh ngarkesat e jetës bashkëkohore. Por inkorporimi i bimëve në ambiente të mbyllura mund të jetë një mënyrë e shkëlqyer për të qenë në kontakt me natyrën dhe për të krijuar një ambient të qetë.

Nga perspektiva fetare, Islami i kushton një rëndësi të madhe natyrës, e cila shihet si reflektim i krijimit të Allahut dhe urtësisë së Tij të plotë. Ne jemi të inkurajuar të meditojmë dhe vëzhgojmë botën natyrore, si dhe të kërkojmë shenja të plotfuqisë dhe ekzistencës së Allahut në të. Nisur nga kjo, rritja e bimëve në ambiente të mbyllura jo vetëm që përmirëson cilësinë e ajrit, krijon një atmosferë më të rehatshme dhe të shëndetshme, por, gjithashtu mund të shërbejë edhe si një kujtesë për bukurinë dhe llojllojshmërinë e krijimit të Allahut.

 

Përfitimet e gjelbërimit në hapësira të brendshme:

 

·        Bimët funksionojnë si filtrues natyral të ajrit, largojnë ndotësit e rrezikshëm dhe sjellin oksigjen të pastër.

·        Bimët ndihmojnë në zvogëlimin e stresit. Studimet tregojnë se prania e bimësisë ndikon pozitivisht në uljen e niveleve të stresit dhe ankthit, duke krijuar një atmosferë qetësie dhe mirëqenieje.

·        Bimët japin një prekje të natyrshme elegante dhe i japin bukuri ambienteve të brendshme, duke ndikuar pozitivisht edhe në humorin tonë.

·        Rritja e bimëve në ambientet e punës ose shtëpisë ka treguar se rrit produktivitetin dhe kreativitetin e individëve.

 

Disa këshilla për të përfshirë bimët në brenda ambientit tuaj:

 

·        Analizojeni zonën ku planifikoni të vendosni bimët. Para se të filloni, hulumtoni mbi ndriçimin dhe kushtet që u ofrohen në shtëpi. Pastaj, zgjidhni bimë që mund të adaptohen dhe të mbijetojnë në këto kushte.

 

·        Nëse nuk keni përvojë në mirëmbajtjen e bimëve, filloni me llojet e luleve e bimëve që kanë nevojë për kujdes më të vogël, siç janë: gjembacët, zambakët, etj.

 

·        Përdorni vazo të përshtatshme, për të harmonizuar bimësinë me dekorin e shtëpisë; për të treguar një stil të veçantë, mund të përdorni vazo prej materialeve të ndryshme si qeramikë, terrakota madje edhe shporta të thurura.

 

·        Krijoni një kombinim me bimë të llojllojshme për të projektuar një pamje tërheqëse. Kombinoni bimë të gjata, të mesme dhe të shkurtra dhe në këtë mënyrë ju do të krijoni një peizazh të bukur.

 

·        Përdorni hapësirën vertikale për të varur vazo me lule ose mbillni bimë kacavjerrëse. Mund të vendosni edhe rafte në mure për të vënë aty bimët vertikalisht.

 

·        Bimët mund të shërbejnë si ndarës natyralë të hapësirave të brendshme dhe të ndajnë zona të ndryshme të shtëpisë.

 

·         Kujdesuni për vendndodhjen e bimëve, dritën që marrin dhe llojin e bimësisë që do të mbillni, për të siguruar mirëqenie dhe rritje të shëndetshme.

 

·        Nëse keni rezidencë private, keni mundësinë të shfaqni aftësitë tuaja krijuese duke ndërtuar kopshte DIY (bëje-vetë). Këto kopshte të vetë-krijuara mund t’u japin një mundësi të shkëlqyeshme për të krijuar një ambient të bukur brenda oborrit tuaj.

 

·        Nëse kuzhina juaj ka hapësirë të mjaftueshme, ju mund të konsideroni mbjelljen e erëzave ose perimeve të vogla. Kjo jo vetëm që do të shtojë vlerat estetike, por gjithashtu mundëson edhe konsumimin e ushqimit të freskët.

 

 

Prezenca e bimëve në ambientet e brendshme ka një ndikim të madh në përmirësimin e cilësisë së ajrit dhe uljen e stresit. Mundësia për të krijuar një atmosferë të këndshme dhe relaksuese rreth vetes është lehtësisht e realizueshme. Thjesht, ktheni shtëpinë tuaj në një oazë të qetësisë dhe rehatisë, duke u rrethuar me llojllojshmërinë e bimëve që u pëlqejnë.