Pesë përditësime vjeshtore në ambientet e brendshme.

 

Ark. Brunilda Basha

Ndryshimi i stinëve është koha ideale për një ndryshim në dizajnin dhe rirregullimin e hapësirave të shtëpisë. Është koha ideale për të përditësuar brendësinë e shtëpisë me një stil modern, që i përgjigjet ambientit të jashtëm natyror. Kjo nevojë për të rregulluar shtëpinë përkon me kohën kur gjethet ndryshojnë ngjyrë dhe moti bëhet më i freskët. Nëse do dëshironit t’i jepni shtëpisë tuaj një pamje më të përshtatshme për këtë stinë, si dhe të provokoni ndjesi nostalgjike, provoni të inkorporoni linjat e pastra, format organike dhe një prekje të lehtë tradicionale. Kombinimi i këtyre komponentëve do të ishte i duhur për të krijuar një linjë elegante të ambienteve të brendshme të shtëpisë suaj.

 

1- Përdorni ngjyrat e duhura

Ngjyrat të cilat përfaqësojnë dizajnin klasik nga shekulli i kaluar janë të njohura. Nëse sillni këto nuanca brenda shtëpisë suaj do arrini të krijoni një hapësirë komode dhe mikëpritëse. Pra, një hapësirë të përshtatshme për stinën e vjeshtës. Nuk duhet të mungojë përdorimi i ngjyrave si portokallia e djegur, jeshile avokado dhe e verdha mustardë në pjesën e dekorit. Këto nuanca, qoftë përmes mobiljeve apo bojës së mureve, arrijnë të mbushin hapësirën me një vijë hijeshie të stilit të periudhës nga mesi i shekullit të kaluar, çka do të ofronte një ambient ku ngërthehet tradicionalja me modernen.

  2-Investoni në mobilje unike.

Pjesët e veçanta të mobiljeve që përcaktojnë dizajnin modern e të cilat janë edhe klasike nga shekulli i kaluar përbëjnë një nga komponentët kryesorë. Për t'i dhënë shtëpisë dhe ambienteve të brendshme një ndjesi autentike retro, mund të mendoni të përdorni disa mobilje unike të cilat i rezistojnë kohës. Këto mobilje  jo vetëm që do të përmirësojnë pamjen, por gjithashtu do të mundësojmë përdorim të dobishëm të hapësirave dhe ambient më komod për ju.

 

3- Jepni prioritet thjeshtësisë.

Thjeshtësia dhe minimalizmi janë komponentët kryesorë të dizajnit klasik të viteve 60-të nga shekulli njëzet. Për këtë arsye, është mirë që të adoptoni konceptet minimaliste të dizajnit në këtë vjeshtë. Hiqni qafe dekorin shtesë, zgjidhni sipërfaqe dhe linja të pastra dhe lërini zonat sa më të lira. Zgjidhni copa që i përshtaten këtij stili pasi mobiljet klasike të atyre viteve shpesh kanë forma të drejta dhe të thjeshta që japin një pamje të rregullt.

 

4- Konsideroni aksesorë retro

Aksesorë retro mund të ndihmojnë që ti japin shtëpisë pamjen dhe ndjesinë e dekorit që ngërthen modernitetin dhe klasiken së bashku. Kërkoni orendi shtëpiake tradicionale, si qilima me modele gjeometrike, drita retro ose vazo qeramike. Këto prekje të vogla mund të bëjnë një ndryshim rrënjësor për t'i dhënë hapësirës tuaj atë tërheqje të veçantë të shekullit njëzet.

 

5- Përdorimi i materialeve organiko-natyrore siç është druri.

Dizajni klasik i shekullit të kaluar shumë shpesh përqendrohet në përdorimin e materialeve natyrore si druri, lëkura dhe qelqi. Për këtë arsye, konsideroni të shtoni një bufe druri, karrige me veshje lëkure ose tavolinë kafeje nga qelqi në hapësirën e shtëpisë suaj. Këto materiale, jo vetëm që kontribuojnë në estetikën e këtij stili, por gjithashtu do të sjellin ngrohtësi dhe cilësi.

 

 Këtë vjeshtë përfshini ngjyrat ikonike, duke investuar në mobilje klasike, duke aplikuar parimin minimalist, duke shtuar aksesorë të cilësisë së mirë dhe duke përdorur materiale natyrore. Nëse ndërmerrni këto hapa atëherë do të arrini ta shndërroni hapësirën tuaj në një oazë ku ngërthehet stili klasik i pjesës së dytë të shekullit njëzet dhe kohës moderne të shekullit njëzetë e një. Kalojeni këtë vjeshtë nën atmosferën e një stili të duhur.

Revista Familja, Nentor 2023