Roli i Dizajnit Biofilik në Harmoninë Mendore-fizike

 Ark. Brunilda Basha 

Dizajni biofilik synon të inkurajojë njeriun bashkëkohor dhe mjedisin e ndërtuar të ndërveprojë sa më shumë me natyrën. Sa më shumë komponentë natyral të përdoren në dizajn, qofshin në shkallë urbane apo arkitekturore, aq më shumë ndjejmë praninë e natyrës në jetën tonë. Nëse i referohemi historisë arkitekturore, dy shembuj të suksesshëm që mund të quheshin plotësisht biofilik janë Alhambra në Granada dhe kopshtet mahnitëse të Babilonisë.

Tek njerëzit produktiviteti ose mirëqenia e tyre përcaktohet kryesisht nga ndërveprimet e ndryshme brenda një konteksti gjeografik. Si rezultat, dizajni biofilik krijon lidhje midis njerëzve dhe mjedisit të tyre, forcon emocionet e marrëdhënieve dhe ndjenjën e përkatësisë në një komunitet të rëndësishëm.

Si të integrojmë dizajnin biofilik në projektet tona? Fillimisht dhe mbi të gjitha, identifikoni cilët elementë ose sende natyrore ju shkaktojnë një ndjesi të mirë, ju qetësojnë psikologjikisht dhe ju relaksojnë kur jeni pranë tyre. Një pjesë e njerëzve ndihen të tërhequr nga natyra; si malet apo kopshtet, ndërsa të tjerë preferojnë harmoninë e ujit dhe shpesh ndjehen të qetë duke ecur në bregun e detit. Para se të fillojë çdo projekt dekorimi, është e rëndësishme të njiheni me veten dhe me ato elemente që ju shkaktojnë një ndjesi të rehatshme.

 

 1.      Përdorimi i Bimëve

Një rrugë e shkëlqyeshme për të përfshirë dizajnin biofilik është integrimi i ngjyrave qetësuese përmes floras dhe bimësisë. Kur shtojmë bimë në shtëpinë tonë, do të vërejmë se ato jo vetëm pastrojnë ajrin dhe e freskojnë ambientin, por gjithashtu kanë një ndikim pozitiv në humorin dhe nivelet e energjisë gjatë gjithë ditës. Kjo ndihmon në krijimin e një atmosfere të qetë dhe të relaksuar në hapësirën e ambjentit. Bimët mund të vendosen në vazo, të varura nga tavani, të lidhura në mur, ose kudo tjetër sipas preferencave tona.

 2.     . Aplikimi i Ngjyrave Natyrore

Përdorimi i ngjyrave natyrale  gjithashtu mund të ndihmojë në krijimin e një atmosfere të natyrshme në shtëpi. Ngjyrat kanë një ndikim të rëndësishëm në emocionet e njerëzve. Përdorimi i një ngjyre të gjallërishme mund të shkaktojë entuziazëm në monotoninë e nje dite rutinë, ndërsa përdorimi i tonaliteteve të saj mund të ndihmojë të krijojë një ndjesi qetësie pas një dite të gjatë dhe të lodhshme. Pëfshirja e ngjyrave në shtëpi mund të arrihet duke lyer një mur, duke e përdorur në mobilje, ose duke aplikuar letër murale. Letra murale mund të jetë e kompozuar me elemente natyrore për të krijuar përshtypjen se jeni jashtë ndërsa jeni brenda shtëpisë.

 3.    Prania e Ujit

Uji ka një ndikim qetësues në mendjet tona dhe mund të përmirësojë qetësinë tonë. Qëndrimi në banjë ose pishinë është një mënyrë e mirë për të relaksuar trupin kur jemi lodhur.Pprania e ujit dhe tingujt e tij mund të krijojnë një zonë shëruese brenda shtëpisë. Nëse kemi mjaft hapësirë, mund të ndërtojmë një lumë në oborr, por nëse nuk kemi mjaft, mund të kemi një akvarium brenda dhomës ose vazo me ujë të rrjedhshëm. Kështu, jo vetëm që krijohet një mjedis i shëndetshëm, por shtohet edhe vlera estetike e pamjes së dhomës.

 

 4.      Maksimizimi i dritës natyrore

Drita është një tjetër mënyrë për të integruar natyrën në shtëpinë tonë. Sa më shumë dritë natyrore të kemi, aq më shumë ndjehemi të lidhur me natyrën. Drita ndikon në ritmet tona të përditshme, rrit vitalitetin dhe na siguron energjinë për të qenë më aktivë. Po ashtu, shumë studime kanë treguar se drita natyrore ndikon në humorin dhe nivelin e lumturisë. Ajo përmirëson natyrshëm mirëqenien fizike dhe emocionale të personit.

 

 5.     .Përdorimi i materialeve natyrore

Përdorimi i materialeve natyrore, si druri, guri, dhe bambu në dizajnin e shtëpisë dhe mobiljeve, përmban një aspekt kyç të Dizajnit Biofilik. Këto materiale jo vetëm janë të qëndrueshme, por ndihmojnë edhe në zvogëlimin e kimikateve potencialisht të dëmshme në mjedisin e brendshëm. Nëpërmjet këtyre zgjedhjeve, krijohet një ambient I shëndetshëm dhe i lumtur, duke lidhur njeriun me natyrën dhe ndikuar pozitivisht në humorin dhe mirëqenien e përgjithshme.